Мөрөн хотод ажиллаж амьдарч буй Арбулагчуудын нэгдсэн золголт өнөөдөр Жаргалан ресторанд боллоо. Энэхүү золголтыг Мөрөн суман дахь Арбулаг сумын Нутгийн зөвлөл зохион байгуулсан юм. Золголтод өдгөө 97 насны босго алхаж буй Долгорын Сүрэнжгээ гуай хүрэлцэн ирсэн байв.

Арбулаг сумаас улс, аймаг, сумын аваргууд олноор төрж, аймагтаа мал сүргээрээ сүүлийн таван жилд хоёрдугаар байрт орж байна. Мөн Улсын хэмжээнд малынхаа тоогоор дээгүүр байрт орж байгаа. Иймээс манай сум хөдөө аж ахуйн чиглэлээр хөгжих боломжтой байгааг харуулж байна. Басхүү өрхийн үйлдвэрлэлийг дэмжсэн, өрхийн орлого нэмэгдсэн он жилүүд биднийг хүлээж байгаа гэж аймгийн ИТХ-ын төлөөлөгч Б.Нямдаваа онцолж, ирсэн зочдод мэндчилгээ дэвшүүллээ.

Золголтод Арбулаг сумыг удирдаж байсан үе үеийн удирдлага болон ахмад, дунд үеийн төлөөлөл өргөн бүрэлдэхүүнтэй хүрэлцэн ирсэнд сумын Засаг дарга С.Аюушжав талархаж, цаашдынх нь ажил амьдралд амжилт бүтээлийг хүслээ.

"Хилэнт-Эх" хэмээх модон луу жилийн хөдөө аж ахуйн салбарын амжилтаар Арбулаг сумаас "Улсын аварга малчин"- 1 , "Улсын аварга саальчин"-1 , "Аймгийн хошой аварга малчин"-2 "Аймгийн аварга малчин"- 9, "Аймгийн аварга саальчин"- 2 тодорсон билээ. Аваргууд золголтод хүрэлцэн ирсэн ахмадуудадаа "Аваргын хишиг" хэмээх гарын бэлэг өгч, урт насалж, удаан жаргахыг ерөөлөө.

Энэ үеэр "Алтан гадас одон"-оор Б.Бямбааг шагнасан бол Монголын мал аж ахуйн академийн "Мал аж ахуйн хүндэт Пропессор" цолыг Хавтага багийн малчин Б.Лүндэгжанцан, Бор гол багийн малчин Ө.Алтангэрэл, Бэл булаг багийн малчин Дашням, Уртбулаг багийн малчин А.Ганзориг нар хүртлээ.

Арбулаг сумын "Хүндэт иргэн" тэмдгийг Ч.Сэрээнэн, Л.Гантулга, Ж.Цогт М.Дуламсүрэн, Ц.Үүртуяа, Ш.Даваапил, З.Даваажав, С.Оюундалай, Н.Отгонбаяр, Б.Эрдэнэбат, Б.Амартүвшин, Л.Батцогт нарт олголоо.

Мөрөн суман дахь Арбулаг сумын Ч.Сэрээнэн тэргүүнтэй Нутгийн зөвлөлийнхэн Аварга малчдад гарын бэлэг гардуулж, энэхүү үйл ажиллагааг өндөрлүүлсэн юм.

Б.Гэрэлням 2025-03-09